Naxçıvan Muxtar Respublikasının İnsan Hüquqları üzrə Müvəkkili (Ombudsman) tərəfindən hərbi hissələrdə hüquqi maarifləndirmə tədbirləri keçirilmişdir. Naxçıvan Muxtar Respublikasının İnsan Hüquqları üzrə Müvəkkilinin fəaliyyətində əhalinin müxtəlif qruplarının, o cümlədən hərbi qulluqçuların hüquqlarının müdafiəsi və təmin olunması və bu məqsədlə hüquqi maarifləndirmə mühüm yer tutur. Naxçıvan Muxtar Respublikasının İnsan Hüquqları üzrə Müvəkkili (Ombudsman) və Əlahiddə Ümumqoşun Ordusu tərəfindən birləşmə və hərbi hissələrdə hüquqi maarifləndirmə sahəsində həyata keçirilən tədbirlərin davamı olaraq əsgər, zabit və gizirlərlə görüşlərin təşkil edilməsi işi davam etdirilmişdir. Bu məqsədlə Naxçıvan Muxtar Respublikasının İnsan Hüquqları üzrə Müvəkkili (Ombudsman) Aparatı Əlahiddə Ümumqoşun Ordusunun müvafiq struktur bölmələri ilə birlikdə Əlahiddə Ümumqoşun Ordusunun "N" saylı hərbi hissələrində hüquqi maarifləndirmə tədbirləri keçirmişdir. Həyata keçirilən tədbirlərdə Naxçıvan Muxtar Respublikasının İnsan Hüquqları üzrə Müvəkkili (Ombudsman) Aparatının şöbə müdiri Abil Orucəliyev, Əlahiddə Ümumqoşun Ordusunun əməkdaşları Riçard İsmayılov, Zaur Həmidov və hərbi hissələrin əsgər, zabit və gizir heyəti iştirak etmişlər. Tədbirdə Naxçıvan Muxtar Respublikasının İnsan Hüquqları üzrə Müvəkkili (Ombudsan) Aparatının şöbə müdiri Abil Orucəliyev "Əmri icra etməmə cinayəti və məsuliyyət" və "Hərbi qulluqçular arasında Azərbaycan Respublikası Silahlı Qüvvələrinin Daxili Xidmət Nizamnaməsindən irəli gələn qarşılıqlı münasibətlərin düzgün qurulması, onlar arasında hərbi nəzakət və hərbi etiket qaydalarının düzgün yerinə yetirilməsi" mövzusunda geniş məruzə ilə çıxış etmişdir. Yekun sözlə çıxış edən Əlahiddə Ümumqoşun Ordusunun zabiti Riçard İsmayılov əsgər, zabit və gizirləri qeyri-qanuni hərəkətlərdən çəkinməyə, qanunvericiliyin və hərbi nizamnamələrin tələblərinə daim əməl etməyə çağırmış və əsgər, zabit, gizir heyətinə uğurlu xidmət arzulamışdır. Tədbirin sonunda iştirakçıları maraqlandıran suallar ətraflı şəkildə cavablandırılmışdır.
01/09/2014
| 
