Ombudsmanın Preventiv qrupu tərəfindən sentyabr ayı ərzində də bir sıra başçəkmələr həyata keçirilmişdir. Naxçıvan Muxtar Respublikasının İnsan Hüquqları üzrə Müvəkkilinin Preventiv mexanizm qrupu Naxçıvan Muxtar Respublikası ərazisində yerləşən azadlıqdan məhrum etmə yerlərində, müvəqqəti saxlama təcridxanalarında, o cümlədən müvafiq sosial müəssisələrdə saxlanma şəraitini və vəziyyəti daim diqqətdə saxlayır, bu müəssisələrdə müntəzəm olaraq planlı monitorinqlər aparır, qısa və uzunmüddətli başçəkmələr həyata keçirir. Buna uyğun olaraq cari ilin sentyabr ayı ərzində Müvəkkilin Preventiv qrupun üzvləri Naxçıvan Muxtar Respublikası Daxili İşlər Nazirliyinin Ordubad, Culfa, Şahbuz və Babək Rayon Polis Şöbələrində, Naxçıvan Şəhər Polis İdarəsində, habelə Əlahiddə Ümumqoşun Ordusunun tabeliyində olan Naxçıvan Qarnizon Hauptvaxtında, Naxçıvan Muxtar Respublikası Əmək və Əhalinin Sosial Müdafiəsi Nazirliyinin tabeliyində olan "Ahıllar Evi"də və Naxçıvan Muxtar Respublikası Təhsil Nazirliyinin tabeliyində olan Ordubad Şəhər Tam Orta İnternat Məktəbində əvvəlcədən xəbərdarlıq etmədən başçəkmələr həyata keçirmişdir. Birləşmiş Millətlər Təşkilatının "İşgəncə və digər qəddar, qeyri-insani və ya ləyaqəti alçaldan rəftar və ya cəza əleyhinə Konvensiya"nın Fakültativ Protokolu və "Naxçıvan Muxtar Respublikasının İnsan Hüquqları üzrə Müvəkkili (Ombudsman) haqqında" Naxçıvan Muxtar Respublikası Qanununun tələbləri əsasında təşkil edilmiş başçəkmələr zamanı qeyd edilən müəssisələrdə işçi heyətə yeni növ koronavirus infeksiyasının (COVID-19) geniş yayılmasının qarşısının alınması, onunla mübarizədə ölkəmizdə tətbiq edilən xüsusi məhdudlaşdırıcı tədbirlər və epidemiyadan qorunmaq üçün sosial məsafənin saxlanılması və gigiyena qaydalarına ciddi əməl olunması ilə bağlı maarifləndirici məlumat verilmiş, saxlanma şəraiti və rəftar məsələləri araşdırılmış, bütün kameralara baxış keçirilmiş, qidalanma, tibbi yardım, gəzinti, görüş, telefon danışıqları ilə bağlı sənədlər yoxlanılmış, saxlanılan şəxslərin beynəlxalq və milli qanunvericiliyə uyğun şəkildə hüquqlarının təmin olunması vəziyyəti öyrənilmişdir. Başçəkmələr zamanı Preventiv qrup tərəfindən pozuntu halları aşkar edilməmişdir. 29.09.2020
|
